لا للغلاء ..
والغالى متروك .. مقاطعة اورنيك 15 يوم 1 نوفمبر
الحكومة قاعد تتعامل معانا كتاجر
والانسب نتعامل معاها بلغة السوق
والواقع بيقول احنا القاعدين نصرف علي الحكومة ..
لانو الاقتصاد منهار .. وهي بتعتمد علي الجبايات..
كل جنيه بتدفعو .. بمشي منو 70 قرش للامن والجيش والشرطة ..
ما صعب انك تستغني عن 30 قرش لمدة شهر .. دا اذا كان بتوصلك الخدمات ..
المشهد القادم
المحروقات ح تزيد ..
الناس كالعادة ح تسكت ..
المعارضة ح تجعجع ..
الحكومة حتاخدا العزة بالاثم .. والفجور الاخلاقى ..
والعالم الخارجى ما شغال بينا ..
طيب والحل شنو ؟؟؟
المشهد المطلوب ..
نحاصرهم اقتصاديا
المعلومات بتقول الحكومة عاجزة عن انها توفر مرتبات شهر اكتوبر ..
يعني ظهر البعير مستني قشة ويتكسر
دا الحل ..
و ..
قالوا سيدنا عمر رضى الله عنه قبل 1400 سنة أو يزيد ..
الغالى متروك ..
هل نقاطع الوقود والخبز ..
لا ..
ما ديل ..
نحنا ح نقاطع التعامل المالى مع الحكومة
.. ح نقاطع اورنيك 15
و ح نقاطع خدمات الحكومة البقت غالية ..
اضافة الى رداءتها .. ومحسوبيتها ..
ما ح نقالعا ..
ولا حناكل حقها ..
اللى هو اكيد ما حقنا بحكم القوى على الضعيف ..
وما ح نطلع الشارع ..
ولا ح نعمل جوطة ..
ولا عصيان مدنى ..
نحنا ببساطة ح نستغنى عن خدمات الحكومة لمدة شهر واحد ..
.. ما ح نشترى كهربا ..
بس ح نشترى 200 كيلو الدعم الاولى ونقتسط
ما ح نعمل معاملات مالية ونستخرج ارانيك مالية ..
ح ناجلا شهر
اجل ترخيص عربيتك الشهر الجاى ..
اجل تخليص الجمارك الشهرى الجاى ..
اجل معاملاتك فى الاراضى او اى وزارة حكومية للشهر الجاى
ما ح ندفع رسوم نفايات ..
ولمن تجى العربية نقول ليها شكراً جزيلا الشهر دا ما عندنا نفايات ..
الشهر دا نحنا نضاف ..
ح نعلن رفضنا بكل ذوق .. وأدب .. وقانونية ..
ومافى زول ح يجبرنا
ياخ ما دايرين ..
بطلنا ..
مش حُرين ..
وح نعمل حركة جديدة .. على العالم ..
اهى ثورة من نوع جديد ما اصلا نحن شعب الابتكار ..
نثور فى وقت العالم ما عارف معنى انتفاضة
ونركع فى وقت العالم كلو جاب حقو بضراعو ..
بس المرة دى جبناها كبيرة جد ..
كدى فكرو فى كلامى دا ..
عارفين ح يحصل شنو ؟؟
ح نرّكع وزارة المالية .. لمدة شهر
وبدل ما نحنسا نقول ليها ما ترفعى الدعم ..
ح تجى تحنسنا وتقول عليكم الله خلاص غلبنى كتر علي ..
يا سادتى الاعزاء المالية ح تخسر تلاتة ارباع دخلها لمدة شهر ..
ولو كبرت راسا نزيد شهر تانى ..
لمن راسا يجى ..
بس نستحمل ..
لمدة تلاتين يوم صعبة دى ؟؟
كدى فكرو فى كلامى وقرروا ..!!
لو موافق ..انشروا معانا و ابقي قدر كلامك معانا .. بداية نوفمبر
